POESIE IN SICILIANO

Figghia d’amuri




Quannu nascisti tu biddizza mia
terra di focu e di priziusu incantu
figghia d’amuri tra lu suli e u mari
ca megghiu matrimoniu un si putia

Ti visteru cu ciuri di biancu girsuminu
e tra capiddi di rami d’alivu
ci misiru la zagara rigina
e lu to ventri ciuriu d’aranciu e mannarinu

Tanti li pretendenti a la to manu
ti inchieru di li beni chiù priziusi
poi accuminciaru violenze ed affanni
infami saracini e poi normanni
s’approfittaru tutti, sbranannu li to carni

E ancora stai accussì biddizza mia
scunfitta, marturiata
nenti stranieri supra la to via
ma na megera chi ti fici mircanzia
portu di scanciu pi traffici n’triganti

E mentri lu suli s’infila sutta u to linzolu
e la luna ti fa di lampadina
priu lu Signuru sutta u stillatu mantu
ca un ghiornu tu putissi riturnari
terra di focu e di priziusu incantu.

Sicilia



Terra d’amuri
e terra di puisia…
'U prufumu di zzagara
e di mari
m’accumpagnunu
quannu sula caminu sutta ô suli...
I ficudinnia
s’ammantiddunu di culuri:
russu, giallu, sancuignu…
Si’ tu ca mi fai chianciri
e mi fai rridiri.
E, quannu 'u suli
supra ô mari s’annia,
iu penzu sempre a tia, terra d’amuri

Amuri ca nun muori mai (Eterno amore)...



Passunu l’anni, passunu li iorna,
ma tu si sempri 'nto mé cori,
cori persu ppi tia!
Tu sì l’amuri eternu,
tu sì l’amuri ca nun mori mai.
Çiatu miu…Rrespira ccu mia ogni secunnu
finu a quannu lu suli sciddica ‘nto mari …
Si ccà ccu mia, çiatu 'nto çiatu…
'U cori bbatti forti ‘nto mé pettu,
accussì forti ca mi scantu
ca mi scoppia intra!
Çiatu dô çiatu miu...
Li nostri distini sunu ccu nuatri
Iu ti vuogghiu 'nbeni accussì ranni
ca tuttu 'u munnu è nicu nicu
davanti a tia!

Sicilia bbedda



Lu mè sguardu
luntanu si perdi
unna 'u suli si spusa cô mari:
chi spusalizziu rranni è chistu cca!
Culuri tinciutu d'aranciu e
sapuri di sali...
L'aceddi 'ntonanu 'ncantu d'amuri;
'nto cielu pulitu 'na vucca russa
lu mè cori
vasa!
Sicilia bbedda,
china di sapuri:
'u to çiauru trasi 'nto cori
Se 'npitturi t'avissi a ddisignari,
oru finu avissi a truvari...
Nâ fina rrina l'amanti
fanu amuri,
mentri la tunna luna
li stapi a taliari...
Comu ti pozzu scurdari
se tu bbedda m'appari?

'U piscaturi


'Iavi 'a 'peddi rura e scura
'iadduta 'ra calura,
'i manu ranni, 'chin'i caddi
'ie 'u sali 'ianchu 'nde capiddi.


'A vacca 'iè 'i sò peri
'ie 'u ventu 'i sò pinsèri,
'u mari 'u fà parrari
'ie 'u suli smummuriari.


'Dò pisci 'iavi 'u ciàuru
precisu 'a chiddu 'ro mauru,
'ie l'occhi funni funni
'su comu 'a spuma 'ca cunfunni.


'Cò mari camina 'a 'bbraccettu
'ie quannu 'su luntani,
comu 'nu zitu,
'n'attrrova rizzettu. DEDICATA AI PESCATORI DI ASPRA UN CALOROSO ABBRACCIO ciau

A' mamma

Se unu mi ricissi: - Vuoi canciari?
Iu ti rugnu i ricchizzi ro' mari,
tutti i petri priziusi e l'oru finu
se tu mi runi a' mamma!
Iu ci pienzu 'n mumentu...
chi c'è cciu miegghiu ri cu t'asciuga i lacrimi,
ccu na' carizza e na' parola aruci,
ri cui ppi ttia si carrica na' cruci,
e ti cantau "Sciatuzzu, ninna nanna!"
Ci pienzu e ppui rispunnu:
- Tieniti tuttu u' munnu
ca ppi mia nun c'è cciu riccu
ri cu avi a' mamma.

SCRITTE DA ROSEMARY .(DEDICATE A TUTTI GLI AMICI DI ASPRA E NEL MONDO )

MA QUESTE POESIE SONO BELLISSIMEEEEEEEEEEEEEEEE
CHI E' ROSEMARY ? LA CONOSCIAMO?
FALLA ISCIRVERE PURE SUL FORUM...LE SUE POESIE SONO
UN INNO AL NOSTRO AMORE E ALLA NOSTRA PASSIONE
PER LA SICILIA...

Scinni `u piscaturi
`a varca a mari
pi n`autra jurnata
china di sururi.
Accussì è la vita,
comu navigari
`nta `n mari di gioi e di duluri.
Pacienza ci voli
a lu piscari,
e ccu pacienza
si tira a campari;
ittannu `a riti
ogni matinu
e ringraziannu a la sira
`u distinu,
comu `u piscaturi
ca sempri accetta
chiddu ca `a sorti so ci porta.
Mudestu è lu me campari
di piscaturi `nta `stu gran mari,
priparu amu e isca ogni matinu,
e comu voli Diu
cummattu `u distinu.

Bellissime poesie. Preziosi i contenuti e piacevole la forma scorrevole e musicale che possiedono, complimenti Rosemary. ciau

Complimenti

E` SEMPRE UN PIACERE LEGGERE DELLE BELLE POESIE .....COMPLIMENTI