LA POESIA IN SICILIANO.

Acqua di mari





L'acqua di lu mari è tanta!
Ora è 'na carizza pi la rina,
poi 'na valanga pi lu scogliu.
Ora è frinisia cu tantu dogliu,
e po' malincunia vispirtina.
Curri, s'affanna, s'arrabbìa,
si stanca... e cchiù nun canta.
L'acqua di lu mari è veru tanta!

Bedda signura





Picchì nun mi vulisti cchiù tra la to genti
bedda signura di ciuri 'i mennula odurusa,
bedda Girgenti,
picchì di lu to beni 'un n'appi nenti
sta figlia di lu to sciatu assa' smaniusa?
Ju, l'occhi 'nni lu to mari ci lassava,
ju, l'arma 'nni lu to celu libbirava!
E tu bedda signura chi mi dasti?
Nenti di tia m'arristà,
ma tuttu di mia ti tinisti:
lu meggliu tempu, li primi suspiri e la biddizza.
E tu bedda signura chi mi dasti?
Sulu ogni tantu...'na carizza.
Però, ci fu cu' cchiù di tia appi forza
scippannuti 'n'agnuni 'ntra 'na chiazza,
'na chiazza 'nfacci lu mari situata
e di virdi giganti cunfurtata,
ca adaciu movinu li fogli paciusi
pi fari a ninnaredda a Chiddi 'nchiusi,
dda chiazza unni la paci eterna è garantita
e d'unni sta figlia allammicata
t'avi a mannari l'ultima vasata.

Na matri











'Na matri è chidda
ca tuttu 'nni lu cori s'arricogli,
'na 'ngustia,
'nu turmentu,
'na gioia e 'na spiranza di li figli,
tinennusi li mali di lu munnu
e limpiannucci la vita di l'affanni.
Parla 'na matri !

Ancora...sempri





Ancora, ancora,
turnati ancora
mumenti 'nfatati,
dilizi sculuruti
di quannu u cunticeddu mi facjanu
muvennu la vuccuzza
comu pi parlari
e cantu di cardiddi
'nni l'arma m'arrivava !
Di quannu cu a manuzza
lu jtu m'affirravanu,
pruvannu tuttu 'nzemmula
amuri 'nni lu dari
e piaciri 'nni lu teniri,
L'avissu vulutu eterni ddi mumenti,
pi sempri dd'armunia
fatta di piulìi e di silenzi,
e la vulissi ancora
'na manuzza ca mi cerca,
'na vucidda ca mi chiama...
ancora, ancora,
sempri !

Mi piaci 'u me' dialettu





Mi piaci 'u me' dialettu,
mi piaci, mi piaci,
mi piaci di quannu
avja du' anni
e me' matri m'annacava:
- Ninna vò,
ninna vovedda,
dormi, dormi, palummedda... -
Mi piaci di quannu 'u me' fratuzzu
risugliava li carusi nno'bagliu
gridannu: Picciò, nni mucamu ? -
Mi piaci di quannu
mi taffiava
cicaruna 'i latti
cu pani 'i casa minuzzatu
e sucameli 'i simula
ammargiati 'i sucu.
Mi piaci di quannu
qualcunu pi la strata,
passannumi vicinu
murmuriava:
- Ti spardassi di vasati, -
facennumi 'ncricchiari
'i quadanati.
E mi piaci puru ora
sparari 'nne' l'oricchi:
- Nun m'atturrari, -
a cu' lu cuètu
nun mi voli dari.
Mi piaci cantuniàri
a mala genti
sdivacannumi la panza
senza canniari li paroli.
Mi piaci, addimurari
'nna me' terra,
manciari a muzzicuna
a cu' la sparra
e farinni minnitta 'i cu' la nzunza.
E lu parlu sempri
'u me' dialettu,
lu cantu
a li timpi timpi caminannu
o nno' zarbatu,
circannu zarchiteddi
pi lu maccu
e vanniannu mentri
'nforza lu sciroccu:
- Fimmina sicula sugnu
e mi nni vantu ! -

SPERO CHE VI PIACCIANO NON SONO MIE NON SONO A QUESTO LIVELLO CIAO A TUTTI ::

belle...... bravo nino anche se non son tue e` sempre bello leggere delle belle poesie

molto belle..... ma di ki sono???

SI NINO VOGLIAMO SAPERE L'AUTORE...COMUNQUE HAI AVUTO
UN PENSIERO TROPPO CARINO PER TUTTI NOI CHE OGNI TANTO
SENTIAMO NOSTALGIA DEL DIALETTO...

LAUTRICe DI QUESTE POESIE SI CHIAMA Esther Ciulla NON SO CHI SIA MA HA BELLE POESIE.