Austìììììììì!!! cca sugnu,
tu un'ha fari avutru chi parrari. Te cca fuma..... assuppati stu Vecchiu Piscaturi :botta: :ciau:
Vecchiu piscaturi
A nasca a patata
Arrappata e ‘ntrippata
Comu un pirittuni maturu
Supra ‘na vucca sgangulata
Ca cuntava cosi antichi
Di na vita di nisciuti a mari.
Niuru, comu un tizzuni arsu d’’u suli
U sali ci abbruciò puru l’arma
Li jirita fidduliati d’’u pilu d’’i palàncari
Ma iddu, cuntentu era
Picchì chidda era ‘a sò vita
Ddà, sutta ‘u picu d’’u suli
E quanta acqua ‘i celu, c’assuppò ‘a sò peddi
E furturati ‘i mari
Ca pareva un dumaturi d’ unni.
Ora ‘i sò occhi chiancinu senza lacrimi
Talìa ‘a sò varcuzza tirata ‘n siccu
Appuntiddata cu dui traviceddi camuluti
E penza, ca comu iddu
Addivintò tantu lasca
A lu puntu d’un putiri cchiù stari ‘n summa.
Quanti piscati ricchi ‘nsemmula ad’ idda
E quanti vuccati amari
Pi li voti ca s’arricampava a la casa
Senza un pezzu di pani pi li picciriddi.
Ora iddu vulissi aviri la forza
D’ammuttari dda varcuzza
E faricci allisciari ancora ‘u lignu d’’i paràti
Finu a pusarla ntall’acqua
Pi fari ‘nsemmula, l’urtima piscata
E affunnari cu idda…araçiu
‘ntò sò mari.
Vincenzo Aiello